Куќа на Талви Јаков

Индивидуалната куќа на Талви Јаков е проектирана во периодот меѓу двете светски војни, и проект за доградба на архитектот Кирил Жерновски од 1931 година. Не е познато дали проектот за целата куќа е дело на истиот архитект. Објектот е поставен на агол од периметрален блок, ги следи уличните фронтови на двете улици, при што од едната страна граничи со објект, додека од другата страна е предвиден пристап кон двор, а со тоа и слободна фасада. Нагласувањето на аголот е преку полигонален ерекрен испуст во прв и втор кат кој се претопува во бетонска ограда на терасата на поткровје - карактеристично средство во модерниот архитектонски израз. Додека, како хоризонтална доминанта се истакнува линијата помеѓу приземјето и катот, како и линијата на раздвојниот венец. Симтеријата на објектот е разбиена со доминантна вертикала на природно осветленото скалишно јадро на една од уличните фасади. Главниот влез на објектот е од улица, но се пристапува и од страничниот двор. Се развива во сутерен, приземје, два ката и поткровје и секој стан има свој посебен влез од подест. Светла висина на просториите е 3,50 м, а на подрумот 2,50 м.