Станбена зграда на улица „Орце Николов“ бр. 72

Станбениот објект на Колономос Бенко е проектиран од Михаел Матвејев во 1937 год. Објектот е дел од низа, поставена линиски, ориентирана кон внатрешноста на блокот, одделена зонски со парк. Уличната фасада ја следи линијата на фронтот, додека задната фасада е ориентирана кон друг објект. Задната половина на објектот е потесна и се отклонува од источниот фронт, со што се формира мал двор, кон кого се ориентирани отворите. Објектот се развива во подрум, приземје и два ката во задната зона и во неа се наоѓа кујната репетитивно, додека во предната зона се издигнува и поткровје од кое се излегува на проодна кровна тераса врз останатиот волумен. Во објектот се влегува и од јужната и од северната страна, во заедничко скалишно јадро, додека на приземјето е овозможено и влез преку тераса. Објектот го следи типичниот модерен израз, едноставна геометризација на волумен, со исфрлување на централниот дел во прв и втор кат, кое преоѓа во парапетна ограда за тераса на поткровјето, а симетријата на објектот е нарушена со еднострани балкони во длабочина на испустот, кои формираат мал трем во приземјето.