Станбена зграда на улица „Димитрие Чуповски“ бр. 5

Станбениот објект се наоѓа во строгиот центар, скулптурално поставен на главната улица на градот Скопје. Објектот е дел од периметрален блок, изграден во вид на „П“ форма, два краци и полукружен дел кои ги спојува. Трактот ориентиран кон улицата е подолг од другиот ориентиран кон внатрешен двор, додека аголното заоблување наговестува на пролаз кон дворот, пауза во блокот, која го двои од соседниот објект. Приземјето на објектот, кон сите три страни реагира со околината преку различни комерцијални дејности. Објектот се развива во приземје, два ката и поткровје, кое е повлечено од фасадната линија, формирајки тераса во централниот полукружен дел, додека балконите на катовите се наоѓаат на трактовите бочно. Фасадата е прочистена, со нагласени хоризонтали под и над прозорците, балконите и раздвојниот венец, карактеристично за академизмот.