Станбена зграда на Шукрет Зеќирије

Објектот на „Лондон Паб“ е проектиран од 1933 до 1934 година од архитект Иван Артемушкин. Објектот се наоѓа во строгиот центар на градот, во еден од периметралните блокови кои ја формираат улицата „Максим Горки“, на самиот почеток од центарот. Објектот се протега на една половина од аголот на блокот, додека од другата страна подоцна се гради прилично симетричен објект на него. Прекршувањето на објектите на аголот, дополнително и нивната геометризација која не ја следи линијата на аголот од блокот, овозможува формирање на плато кое се надополнува во формата на блокот. На тој начин комуницира не само со уличниот фронт, туку и со отворените визури кон центарот на градот (денес плоштадот). Објектот се развива во комерцијално приземје и четири станбени ката, со што е предвиден влез во еден од дуќаните од самиот агол, додека влезот во другиот дуќан, како и главниот влез во објектот за станбените единици се пристапни од улица „Прстолонаследник Петар“ (денес „Максим Горки“). Објектот е проектиран со централно поставено, природно осветлено скалишно јадро, кое внатрешно го дели објектот на два дела, и тоа во приземјето на два дуќани, со сервисна зона и пристап од внатрешниот двор, додека на секој од катовите се пристапува кон два стана, чии простории за дневен престој и спални соби се ориентирани надворешноста на аголот, а сервисните простории во задната, внатрешна зона. Објектот се карактеризира со чиста геометриска композиција предводена од академизмот. Нагласувањето на аголот е преку елемент на аголен балкон со бетонски огради и столбови, како и надвишување на кровниот надоѕидок во истата зона. Доминантното влијание на модерните сфаќања на архитектурата се воочува и преку изведбата на прозорските отвори во линиска композиција, во хоризонтални ленти – препознатлив елемент на модерната архитектура.