Железничка станица - Скопје / Музеј на град Скопје

Старата железничка станица, дело на архитектот Велимир Гавриловиќ, позиционирана во центарот на градот, како завршна точка на аксијалата север-југ (Камени мост - Железничка). Ова е монументален објект со три волумени од кои средишниот доминирал по својата должина, висина и обработка на северната (предна) фасада. Трите волумени на објектот функционирале како посебни целини, со меѓусебно поврзување на одредени места заради овозможување внатрешна комуникација во објектот. Истиот бил еден од покомплексно дефинираните објекти кај кој елементите на традиционалната архитектура се застапени во основната концепција и на специфичен начин употребени во третманот на некои елементи од декоративната пластика. Посебна вредност на овој објект му дава присуството на различни архитектонски концепти и различни стилски форми кои произлегуваат од богатата средновековна традиција, но и форми кои се карактеристични за модерниот архитектонски речник и форми од фолклорната традиции. Основната концепција, поставувањето во просторот како и организацијата на фасадните волумени биле изведени со примена на симетрија во двете оски, со што се потврдуваат доминантните врски со монументалниот академизам. Доминантно место во архитектонската композиција заземала предната фасада во која и визуелно и функционално завршувала оската на движењето на Камениот мост и плоштадот. Средишниот волумен имал колонада од витки столбови развиени во две катни висини, изведени по примерот на порано изградениот Офицерски дом. Лаковидните тремови кои се наоѓале на бочните фасади јасно укажуваат на врските со одредени фолклористички формули и дефиниции, а од друга страна се надоврзуваат на традицијата на употреба на куси гломазни столбови во низа на аркадни отвори. Во катастрофалниот земјотрес од 1963 година, урнат е поголем дел од објектот, зачуван е западниот бочен волумен и мал дел од средишниот волумен.