Станбена зграда на фамилија Крстиќ

Станбената зграда на фамилија Крстиќ се наоѓа во центарот на градот, на една од најбитните развојни оски (север-југ) на градот, од плоштад „Македонија“ до старата Железничка станица. Објектот е дело на архитектот Иван Артемушкин, кое се одликува со симетрично решение, дел од периметрален блок со акцент на аголот и поделба на сегменти. Формата е разиграна со повлечени и испакнати делови, а заоблената естетика на фасадата е пресликана и во решавањето на станбените простории. Она што е посебно забележително во концептот на овој објект, претставува постоечкиот модернизирачки коректив, заради кој е направена максимална редукција на пластичните ефекти во корист на еден прочистен израз, кој според начинот на компонираните фасадни елементи делува во духот на определбите на рано-модерната европска архитектура. Таквиот став го градат повеќе карактеристични елементи, посебно специфичната ограда изведена со челични профили во линиска композиција. Тука е видлива тенденцијата и експериментирањето со формите од репертоарот на модерната архитектура, што во овој случај резултирало со еден вид „преодно“ решение со доминантни архитектонско-стилски влијанија на академизмот.