Спомен костурница на паднатите борци во Балканската војна 1912 „Зебрњак“

Единствен споменик на овие простори е споменикот на паднатите воини во Кумановската битка на 23 и 24 октомври 1912 година, подигнат на ридот Зебрњак на 511 м надморска висина, во близина на Куманово. Овој меморијален комплекс е подигнат во чест на загинатите српски војници, во кои имало и Македонци, кои учествувале во Кумановската битка во 1912 година, за време на Првата балканска војна. Оваа битка се смета за исклучително значајна со која се означила победата на српската војска над турската, со што започнало ослободувањето на југоисточна Европа од Отоманската империја. Сепак од македонска историографска перспектива, овој настан се оценува и како почеток на српската колонизаторска власт над Вардарска Македонија. Идејата за подигнување на споменикот се појавила уште во 1922 година, кога група српски воени ветерани формирале одбор за оваа цел. Сепак, изградбата започнала дури во периодот од 1934 до 1937 година. Споменикот бил свечено осветен на 31 октомври 1937 година, на 25-годишнината од победата во Кумановската битка. Споменикот е експресионистички обликувана спомен-кула (кула-обелиск) висок 48,5 метри, изградена според проектот на архитектот Момир Коруновиќ, а изведбата на градежните работи ги доверил на г. Михаило Аранѓеловиќ, градежник од Белград. Коруновиќ е автор на повеќе спомен-обележја, спомен-костурници, спомен-домови, спомен-чешми, Соколски домови и стадиони подигнати во чест на династијата Караѓорѓевиќ. Споменикот бил изграден од најтврди базалтни камени блокови и армиран бетон, а била финансирана од доброволни прилози на преживеаните борци од Кумановската битка. Споменикот бил урнат на 24 мај 1942 година, во текот на Втората светска војна од страна на бугарскиот окупатор.